معاناتي مع الإجازه المرضيهـ

اليوم الإثنين..ماداومت..راحت علي نومه...

المهم صحيت بعد الدوام بنص ساعه..

وكان علي ثلاث إنذارات يعني مافيه أمل يمشيها رئيسي..

دقيت على الشباب بالدوام..وش الحل

قالوا دبر نفسك بـ sick leave> اجازه مرضيه

قلت خير اجل قولوا له بندر مريض اليوم...

نمت بضمير الين بعد العصر....

يوم قمت تقهويت وعيّنت من الله خير..

يوم جا بعد المغرب قمت ابي دور لي عذر...

طبعا دقيت على واحد من الشباب ابيه يخاويني..قال: أنا أصلا مطنش لي أسبوعين ....>صديقي عسكري مو مدني

قلت: أوووووف اسبوعين وش تبي تسوي ..قال: مرني ويحلها ربك

أخذته معي...>بدأت رحلة البحث عن سكليف

رحت لمستشفى المانع فيه دكتور كم مره اوديله ناس يسوون عملية ليزك بعيونهم عشانه صديق

يوم جيتهم بالإستقبال وعند وحده سمراء ولابسه برقع هع قالت الدكتور مازن اليوم ماعنده عياده اليوم عمليات..

لاحوووول وش الحل..
جتني فكره...علمني فيها صديقي قبل
واروح اشري سانوتش بيض ..وآخذ البيض واحطه بعيوني افركهم فيه ابيهم يقلبون حمر

قامت عيوني تدمع بس ولونها عادي..

قلت باغير المستشفى لأن هذا مافيه الا اثنين وكلهم فل

رحت لمستشفى اللؤلؤ..بحارتنا
جيتهم قلت: ابي دكتور العيون..فتحوا لي ملف وصور بطاقتي الطبيه قالي روح عند الدكتوره شيلفا ؟؟؟؟؟
دكتوره..
مافيه دكتور قال لا ماعندنا الا وحده دكتوره هنديه.......>ياربي

المشكله ماحب اطلب مره شي ..لو رجال يمكن اقوله تكفى ويطلع من هنود القبايل اللي هناك ويحذف سماعته ويقول ابشر بعزّك

المهم..دخلت عليها الا طلعت نفسيه وحاطه كمام مدري غطا على خشمها ماطالع الا عيونها تقول عيون سروق

قلت لها دكتوره عيوني بس تدمع وانا صديقي ساكن معي له اسبوع عيونه كذا شكله اعداني......> كذاب ابيها تقول حساسيه خطيره

قالت اشوف ..بعدين كتبت وصفه وقالت بالسلامه

قلت دكتوره ماينفع راحه عيوني بس دموع..>شوي والا ابكي
قالت لا وتطير عيونها فيني......>حسيت انها كشفتني ..هههههه قلت ثانكيو د.شيلفا

وطلعت ودموعي طلعت جد هالمرّه ....>آخر انذار

احترت مدري وين اروح..
وآخذ الجوال وادق على خويي عادل الشمري خبره بالسكاليف(الاجازات المرضيه)..
وش الحل ياعادل قالي عندي لك وصفه سوّها وبإذن الله يعطونك دايم اسويها
اسعفني
قال ابشر خويي الدكتور مسافر بس هذي ماحد يكشفك فيها...قلت هاتها تكفى

قالها لي..ورحت للمستشفى الوطني بالجبيل
وافتح ملف واقول ابي دكتور عظام اخصائي...>يلعن ام الثقه اخصائي بعد

قالي روح عند الدكتور سعيد غرفته مقابله الاستقبال..>يوم دريت وابدا اعرج...ههههه

يالله لحقت عليه بيسكرون الساعه ثمان الا عشر بالليل

وادخل عليه الا ذاك المصري المتعافي...منفرط على كرسي وطالع مع الجوانب..

فيك إيه يا ابني.
قلت دكتور ظهري ذبحني ورجلي ماقدر احركها ..دكتور ألم يادكتور..

قال أووم عالسرير عاوز اكشف عليك..

جلست قالي لأه نام على ظهرك....>شكيت بنفسي
قلت اوكي..
بعدين حط يده تحت صدري وقالي ارتفع وبدا يضرب على ظهري دوووب دووب دوووب فين الألم ...>دلخ من العوار نسيت اصيح
من عذري المصري يده تقول يضربني بكرسي...بس اصبعه الصغير تقول راس ورع
المهم بعد مكسر ظهري قالي عندك تمزق شديد بالعضلات بس حاديك مرهم وبإزن الله حاتخف

قلت له دكتور انا شغلي اوبريشن بالمصانع عادي اشتغل.....>المح له يعني افهمها\
قال لأه خف على نفسك بس عادي روح الشغل حأديك لايت ديوتي......>يعني أعمال خفيفه..
يمين يسار كاهي هناك تنطرني........>هذا وانا طالع بسرعه......

خويي بالسياره يلعب لعبة البلوت بالجوال..

المهم...

جيته وش العلم قلت العلم ..أكلتها...

وادق على واحد من العيال عسكري بيته قريب من المستشفى تذكرته قلت باشكي له..

يوم علّمته قال مستشفيات خاصه بفلوس ومايعطونك..لحظه عندي منصور يسمع سالفتك..ويضحك

منصور الرويلي عندك ...يضحك بدزن سنون....>منصور اداري بالمستشفى ماله شغل بالعيادات

قالي خذ كلمه
واسولف معه
قال خلاص تعال تقهو وانا باروح اجيب لك ذر طبي وارجع
قلت والله يامنصور يابعد عمري انت والله البارح أتحلم فيك وابتسم واني اغليط...طوط طوط ...سكر الخط بوجهي

أدق عليه مره ثانيه..
قال وش تبي..
قلت بس ماتبي اسمي الكامل قال اسمك عارفه كم عمرك ومتى غبت ..
قلت عمري 26 وغبت اليوم وبكره هههههههههههه
قال ابشر

رحت للعيال وتقهوينا وطلعت وورقتي معي.....

خويي العسكري ......>يكتب قصيده بقايدهم....>لا أعذار ولا أوراق.....

وسلامتكم......>باروح أنام..بكره مريض بعد..
نسيت اقول عيوني للحين تعورني من البيض...>الله لايبارك بفهد الهاجري هو وفكرته